काठमाडौं । पछिल्लो एक महीना अवधिमा नेप्सेमा कारोबारमा आउने १३ समूहगत सूचक सबै घटेका छन् । सबैभन्दा बढी उत्पादन तथा प्रशोधन समूहको सूचक १४ दशमलव ०६ प्रतिशत घटेको छ भने कम घट्नेमा विकास बैंक समूहको सूचक १ दशमलव ०६ प्रतिशत मात्रै घटेको छ ।
साउन २७ गते उत्पादन तथा प्रशोधन समूहको सूचक ८ हजार ३२८ दशमलव ६ विन्दुमा रहेकोमा भदौ २७ गते हिजो घटेर ७ हजार १५५ दशमलव ३४ विन्दुमा झरेको छ । त्यस्तै विकास बैंक समूहको सूचक भने साउन २७ गते ५ हजार ४२९ दशमलव २५ विन्दुमा रहेकोमा हिजो अर्थात भदौ २७ गते ५ हजार ३७१ दशमलव ४७ विन्दुमा कायम छ ।
त्यस्तै म्युचुअल फण्ड समूहको १ दशमलव १० प्रतिशत घटेको छ भने वित्त समूहको सूचक १ दशमलव ३६ प्रतिशत घटेको हो ।
पछिल्लो समय लगानीकर्ताको आकर्षण कम पूँजी भएका कम्पनीहरूको शेयरमा पर्ने गर्दछन् । शेयर सख्या कम भएसँगै आपूर्ति कम हुनेले पनि लगानीकर्ताको रोजाईमा ती समूहका कम्पनीको शेयरमा परेको देखियो । त्यस्तै बैंक समूहको सूचक पनि एक महीना अवधिमा जम्मा २ दशमलव
७६ मात्रै घटेको छ । यस समूहको सूचक साउन २७ गते १ हजार ५३० रहेकोमा भदौ २७ गते १ हजार ४८८ दशमलव ६९ विन्दुमा कायम भएको छ ।
पछिल्लो समय ३ हजार विन्दुमा पुगेको नेप्से अहिले २६८८ विन्दुमा रहेको छ । पछिल्लो ६ कारोबार दिनमा २ सय अंक घटेर हिजो अर्थात बिहीवार नेप्से ७८ अंक बढेर बन्द भएको छ । असार १६ गते पछि बजार निरन्तर बढेर साउन ३१ गते नेप्से ३ हजार विन्दुमा माथि पुगेको थियो । त्यसपछि बढेको बजारमा प्रोफिट बुक भएसँगै बजारमा विक्रेता हाबी भए ।
करेक्सन पछि बजार २६ सय विन्दुबाट फर्किएको प्रावधिक विश्लेषक बताउँछन् । यसोत पछिल्लो केही समय देखि सरकार र नियामक निकायहरू शेयर बजार सुधारप्रति प्रतिबद्ध देखिएका छन् । राष्ट्र बैंकले पछिल्ला दिनहरूमा क्रमशः खुकुलो नीति लिंदै गएको देखिन्छ । बैंकहरुले लगानी बढाउन सक्ने गरी पुनः नीतिहरू परिमार्जन भएका छन् ।
त्यस्तै बैंक ब्याजदर निरन्तर घट्दोक्रममा छ । बैंकिङ प्रणालीमा प्रचुरमात्रामा लगानी गर्न सक्ने तरलता रहेको छ भन संस्थागत लगानीकर्तालाई पनि कर्जाको सीमा खारेज भएको छ । यस कारण पनि शेयर बजारमा सकारात्मक प्रभाव पर्ने जानकारहरू बताउँछन् ।
