अर्थ मन्त्रालयले हाल कायम रहेको ब्रोकर कमिशन घटाउनको लागि नेपाल धितोपत्र बोर्डलाई स्वीकृति प्रदान गरेको छ । २०८१ वैशाख १२ गते मन्त्रिस्तरीय निर्णय गर्दै अर्थमन्त्री वर्षमान पुनले बोर्डको प्रस्ताव बमोजिम ब्रोकर कमिशन घटाउन बोर्डलाई स्वीकृति प्रदान गरेका हुन् ।
धितोपत्र बोर्डको २०८० कार्तिक १ गते बसेको संचालक समितिको बैठकले हाल कायम रहेको ब्रोकर कमिशनमा समग्रमा १० प्रतिशत घटाउने निर्णय गरेर स्वीकृतिको लागि अर्थ मन्त्रालयमा पठाउने निर्णय गरेको थियो। रमेश हमाल धितोपत्र बोर्डको अध्यक्ष हुँदै उनले कमिशन घटाउने निर्णय गरेर मन्त्रालयमा स्वीकृतिको लागि पठाउने निर्णय गरेका थिए। लामो समयपछि अर्थ मन्त्रालयले घटेको ब्रोकर कमिशन कार्यान्वयनको लागि बाटो खोलिदिएको हो ।
कहिले देखि हुन्छ लागु ?
अर्थ मन्त्रालयले ब्रोकर कमिशन घटाउन स्वीकृति दिएको पत्र धितोपत्र बोर्डमा आईसकेको बोर्ड स्रोतले जनाएको छ । अब धितोपत्र बोर्डको संचालक समितिको बैठकले कहिले देखि यो लागु गर्ने भन्ने निर्णय गर्नु पर्ने छ । स्रोतका अनुसार यसबारे निर्णय गर्न हिजो बिहिबार साँझ संचालक समितिको बैठक बोलाईएको थियो । तर अन्तिम समयमा आएर सो संचालक समितिको बैठक स्थगित भएको बताईएको छ । बैठकको लागि नयाँ मिति पनि नतोकिएकोले कहिले निर्णय हुन्छ भन्ने प्रष्ट छैन । अब धितोपत्र बोर्डको संचालक समितिको बैठक बसेर बैठकले मिति तोकेपछि मात्र घटेको ब्रोकर कमिशन लागु हुने छ ।
स्रोतका अनुसार हिजोको बैठकको लागि तय गरिएको प्रस्तावमा बोर्डको नियमित अध्यक्ष नहुँदा कसले काम गर्ने भन्ने बारेपनि एजेण्डा थियो । यस अघि बोर्डको संचालक समितिले बोर्डका कार्यकारी निदेशक डा. नवराज अधिकारीलाई दैनिक कामकाजको जिम्मेवारी दिएको थियो । तर यहि समयमा ऐन संशोधन भएर बोर्डमा अर्थ मन्त्रालयका प्रतिनिधिले बोर्डको अध्यक्षको हैसियतमा काम गर्ने व्यवस्था गरेको छ । यसो हुँदा अब बोर्डको दैनिक कामकाज कसले गर्ने भन्ने अन्योल भएको छ । यद्यपि बिहिबार बोलाईएको बोर्डको संचालक समिति बैठक अन्तिम समयमा आएर स्थगित भएकोले यसबारे पनि छलफल हुन पाएन ।
