भरतपुर, ८ कात्तिक ।
भरतपुर महानगरपालिका- २७ धर्मपुर निवासी युवा समाजसेवी कमल काफ्लेले आफ्नो जन्मदिनको अवसरमा विश्वप्रकाश माध्यमिक विद्यालयका विद्यार्थीलाई शैक्षिक सामग्री प्रदान गर्नुका साथै देवघाटमा रहेको देवघाट समाज कल्याण वृद्धाश्रममा आश्रित वृद्धवृद्धालाई भोजन गराएका छन् ।
निजामती सेवामा कार्यरत काफ्ले हाल चितवन राष्ट्रिय निकुञ्जमा कार्यरत छन् । आफ्नो जन्मदिनको अवसर पारी परिवारका साथ विश्वप्रकाश माध्यमिक विद्यालय भरतपुर- १५ मङ्गलपुर पुगेका उनले कक्षा १० का जेहनदार विद्यार्थीलाई आवश्यक शैक्षिक सामग्री प्रदान गरेका हुन् । त्यस्तै उनले देवघाट समाज कल्याण वृद्धाश्रममा रहेका ५० बढी वृद्धवृद्धालाई बेलुकाको खाना खुवाएका छन् । फजुल खर्च गरेर केक काटेर जन्मदिन मनाउनु भन्दा सामाजिक दायित्वका साथ जन्मदिन मनाउँदा आफूलाई खुसी लाग्ने काफ्लेले बताए ।
विश्वप्रकाश माध्यमिक विद्यालयका प्रधानाध्यापक जयकृष्ण शर्माले काफ्लेको सहयोगले विद्यार्थीहरूको सुन्दर भविष्य निर्माणमा टेवा पुग्ने बताउँदै धन्यवाद ज्ञापन गरे । दुवै कार्यक्रममा पिता शिवलाल काफ्ले तथा माता बालकुमारी काफ्ले एवं श्रीमती भावना काफ्लेका साथमा पुगेका काफ्लेले विगतमा पनि मानव सेवा आश्रमलगायतका संस्थाहरुलाई सहयोग गरी आफ्नो जन्मदिन मनाउँदै आएको बताए ।
