छिमेकी राष्ट्र चीनतर्फ अबिरल वर्षाका कारण भोटेकोशी नदीमा बाढीले रसुवाको टिमुरे क्षेत्रमा ठुलो क्षति भएको छ।
गए राति ३ बजे जिल्ला रसुवा गोसाइकुण्ड गा.पा. वडा नं.२ स्थित रसुवागढीमा चीनतर्फ परेको अबिरल वर्षाका कारण आएको भीषण बाढीले ९ नेपाली, ६ चिनियाँ गरी १८ जना सम्पर्कविहीन भएको जिल्ला प्रहरी कार्यालय रसुवाले जनाएको छ। यस्तै १ नेपाल प्रहरी, १ सशस्त्र प्रहरी बल नेपाल र ७ स्थानीय मानिस गरी ९ जनाको उद्धार गरिएको छ।
सशस्त्र प्रहरी बलका अनुसार बेपत्ता हुनेमा नेपाल प्रहरी अन्तर्गत इलाका प्रहरी कार्यालय, टिमुरेमा कार्यरत प्रहरी सहायक निरीक्षक लालबहादुर श्रेष्ठ, प्रहरी जवान मुन्ना ठाकुर र लोकेन्द्र बोहोरा छन्।
बेपत्ता हुनेहरूमा ६ जना चिनियाँ नागरिक पनि छन्। सूचीअनुसार बेपत्ता हुने चिनियाँ नागरिकहरूमा YU YUE, LI HUAQING, YANG CHUAN, YU HAI HANG, YOU XIAO QIU र JOU YONG छन्। यो सूची सशस्त्र प्रहरीले सार्वजनिक गरेको हो।
बेपत्ता हुने नागरिकहरूमा बर्दिया स्थायी घर भएका जिपन चौधरी, सन्तोष दइत, बुद्धिराम थारु, लक्ष्मीनारायण थारु, सुरेश थारु, बाग्लुङका नरेन्द्र विक, कन्टेनर चालक फुर्वा लामा, मिक्चर चालक गोविन्द मोक्तान, हाइलक्स चालक लोकमान तामाङ रहेका छन्।
जिल्ला प्रहरी कार्यालय रसुवाबाट प्रहरी निरीक्षक कृष्णबहादुर धितालको कमाण्डमा २० जनाको प्रहरी टोली, इ.प्र.का. टिमुरे रसुवाबाट प्र.ना.नि. धनबहादुर तामाङको कमाण्डमा २८ जना, प्र.चौ. रसुवागढीबाट प्र.ब.ना.नि. सुमन महन्त गिरीको कमाण्डमा १२ जना, प्र.चौ. स्याफ्रुबेशी रसुवाबाट ८ जना, प्र.चौ. हाकु रसुवाबाट ७ जना अ.प्र.पोष्ट मैलुङ रसुवाबाट ९ जना प्र.चौ. बेत्रावतीबाट १० जनाको प्रहरी टोली गरी जम्मा ९४ जनाको टोली उद्धार कार्यका लागि खटि गएका छन्।
बाढीले रसुवा गोसाइकुण्ड गा.पा. वडा नं. ५ पासाङल्हामु सडक खण्डस्थित उक्त बाढीको कारण सडक चर्किन जाँदा धुन्चेदेखि टिमुरेसम्म जाने बाटो अवरोध भएको पनि जिल्ला प्रहरी कार्यालय रसुवाले जनाएको छ।
