साताको पहिलो कारोबार दिन आइतबार पनि नेप्से परिसूचक दोहोरो अंकले घटेको छ । कारोबार शुरुभएदेखि तिव्र उतारचढाबका साथ बढेको नेप्से बजार बन्द हुनेबेलासम्म आइपुग्दा ५३.६३ अंकले घटेर २ हजार ६९५.९३ विन्दुमा आइपुगेको छ ।
करिब एक महिनापछि नेप्से परिसूचक २ हजार ७०० विन्दुभन्दा तल झरेको हो।नेप्से सूचकसँगै कारोबार रकम पनि घटेको छ । यो दिन ३३७ वटा कम्पनीको २ करोड ६२ लाख ४६ हजार ४३५ कित्ता शेयर खरिदबिक्री हुँदा १० करोड ५१ करोड रुपैयाँभन्दा बढीको कारोबार भएको छ।अघिल्लो कारोबार दिन बिहीबार भने १२ अर्ब २४ करोड रुपैयाँभन्दा बढीको कारोबार भएको थियो ।यो दिन राम्रा र बलिया कम्पनी मापक सेन्सेटिभ इन्डेक्स पनि ८.९१ अंकले घटेर ४८०.८८ विन्दुमा पुगेको छ।कतिपय बजार बिश्लेषकहरुले लगानीकर्ता अझै पर्ख र हेरको अवस्थामा रहेका कारण बजार र कारोबार दुबै घट्न पुगेको बताएका छन् ।नेप्सेसँग कारोबार रकम पनि निरन्तर घट्दै जानुलाई कतिपय बजार विश्लेषकहरुले भने लगानीकर्ताले कम दरमा शेयर बिक्री गर्न नचाहेको बताएका छन् ।
यो दिन शिर्ष कारोबार गुडविल फाइनान्सको छ। उक्त कम्पनीको ५२ करोड ३१ लाख रुपैयाँबराबरको शेयर खरिदबिक्री भएको छ। त्यस्तै, यस दिन हिमालयन रि इन्स्योरेन्स र नेपाल फाइनान्सको ३३ करोडभन्दा बढीको शेयर खरिदबिक्री भएको छ।त्यसैगरी, नेप्सेमा सूचीकृत १३ उपसमूहमध्ये म्युचुअल फण्ड उपसमूहबाहेक अरु सबै उपसमूहको परिसूचकमा रातो पोतिएको छ। यस दिन म्युचुअल फण्ड उपसमूहको परिसूचक ०.८० प्रतिशत बढेको छ।त्यस्तै वित्त उपसमूहको परिसूचक सर्वाधिक ३.४४ प्रतिशतले घटेको छ।यसैगरी, यो दिन बैंकिङ, होटल तथा पर्यटन र जलविद्युत उपसमूहको परिसूचक २ प्रतिशतभन्दा बढी घटेको छ भने विकास बैंक, लगानी, जीवन बीमा, उत्पादन तथा प्रशोधन, लघुवित्त, निर्जीवन बीमा र अन्य उपसमूहको परिसूचक एक प्रतिशतभन्दा बढीले घटेको छ।
यसैगरी, यो दिन सुपर माइ हाइड्रोपावरको शेयरमूल्यमा सकारात्मक सर्किट लागेको छ भने पिपुल्स हाइड्रोपावर कम्पनी, माइ खोला हाइड्रोपावर र थ्रि स्टार हाइड्रोपावरको शेयरमूल्यमा नकारात्मक सर्किट लागेको छ ।यो दिन हिमालय हाइड्रोपावरको शेयरमूल्य ९.८७ प्रतिशतले बढेको छ ।कुथेली बुखरी स्मल हाइड्रोपावरको शेयरमूल्य ८.७३ प्रतिशतले बढेको छ।
