काठमाडौं । गत आर्थिक बर्ष २०८०/८१ मा नेपालमा संचालित वाणिज्य बैंकहरुले ५७ खर्ब ५४ अर्ब ७७ करोड रुपैयाँ निक्षेप संकलन गरेका छन् । बैंकहरुले सार्वजनिक गरेको गत असार मसान्तसम्मको तथ्यांक अनुसार यस अवधिमा उनिहरुले गरेको निक्षेप संकलन अघिल्लाे आर्थिक बर्षकाे तुलनामा १३.१५ प्रतिशतले बढी हो ।
तथ्यांक अनुसार १ वर्षको अवधिमा बैंकहरुले ४५ खर्ब ७० अर्ब रुपैयाँ कर्जा प्रवाह गरेका छन् । यो पनि अघिल्लो आवको तुलनामा ५.८६ प्रतिशतले मात्र बढेको हो ।
निक्षेप संकलन गर्ने बैंकको सूचीको पहिलो स्थानमा ग्लोबल आइएमई बैंक छ । उक्त बैंकले एक बर्षको अवधिमा ५ खर्ब ४ अर्ब रुपैयाँ निक्षेप संकलन गरेर ३ खर्ब ९० अर्ब रुपैयाँ कर्जा प्रवाह गरेको छ । यस्तै दोस्रोमा नबिल बैंकले ४ खर्ब ६८ अर्ब रुपैयाँ निक्षेप संकलन गरेर ३ खर्ब ८८ अर्ब रुपैयाँ कर्जा प्रवाह गरेको छ । त्यसैगरी राष्ट्रिय वाणिज्य बैंक र नेपाल इन्भेष्टमेन्ट मेगा बैंकको निक्षेप संकलन पनि ४ अर्बभन्दा माथि छ ।
यस अवधिमा सबैभन्दा कम निक्षेप संकलन र कर्जा प्रवाह गर्नेमा स्टान्डर्ड चार्टर्ड बैंक रहेको छ । स्टान्डर्ड चार्टर्ड बैंकले १ बर्षमा १ खर्ब १४ अर्ब रुपैयाँ निक्षेप संकलन गरी ८९ अर्ब रुपैयाँ मात्रै कर्जा प्रवाह गरेको हो ।
असार मसान्तसम्म वाणिज्य बैंकहरुको सीडी रेसियो अर्थात निक्षेप र कर्जाको अनुपात ६० प्रतिशतसम्म पनि झरेका तथ्यांकले देखाएको छ । नेपाल राष्ट्र बैंकको प्रावधानअनुसार वाणिज्य बैंकको सीडी रेसियो ९० प्रतिशतसम्म कायम हुन पाउँछ । २०८१ असार मसान्तमा राष्ट्रिय वाणिज्य बैंकको सीडी रेसियो ६०.७७ प्रतिशतमा झरेको छ । यस्तै, नेपाल बैंकको ७२.४७ प्रतिशत, नेपाल एसबीआई बैंकको ७४.३५ प्रतिशत, ग्लोबल आईएमई बैंकको ७५.८७ प्रतिशत सीडी रेसियो छ ।
८० प्रतिशतभन्दा तल सीडी रेसियो हुनेमा स्ट्यान्डर्ड चार्टर्ड, लक्ष्मी सनराइज, कृषि विकास, एनआइसी एसिया, नेपाल इन्भेस्टमेन्ट मेगा, प्रभु र सानिमा बैंक छन् । सबैभन्दा धेरै सीडी रेसियो प्राइम कमर्सियल बैंकको रहेको छ । यसअवधिमा प्राइमको सीडी रेसियो भने ८६.२ प्रतिशत छ ।
