रेशम सापकोटा
भरतपुर, १९ असार ।
सामान्यतया कपाल काट्ने व्यवसाय भन्नासाथ सेवा र नाफामात्रै सोचिन्छ। तर पपुलर युनिसेक्स सैलुन, भरतपुरले यस धारणा तोड्दै सामाजिक उत्तरदायित्वमा समर्पित अभियानका साथ विद्यालय–विद्यालयमा पुगेर निःशुल्क कपाल काट्ने, सरसफाइ र वृक्षारोपण कार्यक्रम सञ्चालन गर्दै आएको छ।
यही निरन्तर अभियान अन्तर्गत आज भरतपुर महानगरपालिका–१८ स्थित श्री आधारभूत विद्यालय, भुवनबस्तीमा करिब ७० जना विद्यार्थीहरू र वडा नम्बर २६ स्थित श्री आधारभूत विद्यालय, कोइलाहामा करिब ५० जना विद्यार्थीहरूलाई कपाल काट्ने सेवा प्रदान गरिएको हो।
यसै अवसरमा दुवै विद्यालयमा सरसफाइ कार्यक्रम र वृक्षारोपण कार्य पनि सम्पन्न गरिएको थियो। विद्यालय परिसर सफा गर्दै हरियाली प्रवर्द्धन गर्ने उद्देश्यले दुई /दुई वटा रूख रोपिएको कार्यक्रम सहभागीहरूका लागि थप प्रेरणादायी बन्यो।
कार्यक्रममा सहभागी सामाजिक अभियानकर्ता धीरेन्द्रकुमार शाहले विद्यार्थीहरूलाई व्यक्तिगत सरसफाइ, विद्यालयको वातावरण सफा राख्नुपर्ने आवश्यकता, र वृक्षारोपणको वातावरणीय महत्त्वबारे सजिलो भाषामा जानकारी दिनुभयो। उहाँले भने, “विद्यार्थीको विकास पढाइसँगै व्यवहार, सरसफाइ र प्रकृतिप्रतिको जिम्मेवारीमा निर्भर गर्छ। यस्ता कामले सोचमा गहिरो प्रभाव पार्छ।”
श्री आधारभूत विद्यालय, भुवनबस्तीका प्रिन्सिपल गुरुप्रसाद अधिकारीले यस्ता कार्यक्रमले बालबालिकामा अनुशासन, आत्मविश्वास र जिम्मेवारीको भावना बढाउने बताउनुभयो। उहाँले भन्नुभयो, “यस्ता सेवा कार्यक्रम शिक्षाको पूरक हुन सक्छन्। हामी पपुलर सैलुनप्रति आभारी छौं।”
त्यस्तै, श्री आधारभूत विद्यालय, कोइलाहाका प्रिन्सिपल रामभक्त वाग्नेले आफ्नो धारणा व्यक्त गर्दै भन्नुभयो, “हाम्रो विद्यालयमा यस्तो प्रेरणादायी सेवा कार्यक्रम सञ्चालन हुनु गौरवको कुरा हो।
कार्यक्रम संयोजक तथा पपुलर युनिसेक्स सैलुनका प्रोप्राइटर सुलभ सिग्देल (रामप्रसाद)ले भन्नुभयो, “हामी हरेक दिन एक स्थान रोज्छौं र सेवा दिन्छौं। यो हाम्रो व्यवसाय मात्र होइन, समाजप्रतिको कर्तव्य पनि हो।” उहाँका अनुसार, हालसम्म ५२०० भन्दा बढी व्यक्तिहरूलाई निःशुल्क कपाल काट्ने सेवा दिइसकिएको छ।
विद्यालय, कलेज, सामुदायिक संस्था र टोलमा पुगेर सीप विकास, सरसफाइ सचेतना, वृक्षारोपण, आत्मनिर्भरता र सकारात्मक सोच विस्तार सैलुनको अभियानको केन्द्रमा रहेको छ।
यसरी सिप, सेवा, सरसफाइ र समर्पणको त्रिकुणात्मक सम्बन्धलाई आधार मानेर अगाडि बढिरहेको पपुलर युनिसेक्स सैलुनले व्यवसाय र समाजसेवाको उत्तम सन्तुलन प्रस्तुत गर्दै समाजमा सकारात्मक परिवर्तनको उदाहरणीय नमुना प्रस्तुत गर्दै आएको छ।
