चितवन । राप्ती नगरपालिकामा लामो समयदेखि सम्पर्कविहीन भएका प्रमुख प्रशासकीय अधिकृतलाई मेयर शमशेर लामाले भावुक स्टाटससहित हाजिर हुन आउन फेसबुकबाट अनुरोध गरेका छन् ।
मेयरले एक महिनादेखि आफ्नो सम्पर्कमा नरहेका प्रमुख प्रशासकीय अधिकृत सुरेन्द्र प्रधानको फोटो र हाजिर हुन फागुन २५ मा गरिएको ताकेताको पत्र सामाजिक सञ्जालमा राख्दै ‘घर बस्न दिक्क लाग्यो होला, अफिस आउनुस्’ भनेका हुन् ।
राप्ती नगरपालिका राजनीतिक खिचातानीका कारण अहिलेको नेतृत्व आएदेखि नै विवादमा परेको स्थानीय तह हो ।
नियमित नगरसभा, कार्ययपालिका बैठक, नगररपरिषद् समेत गर्न नसक्दा नीति तथा कार्यक्रम कार्यन्वयनमा समेत यो पालिकामा समस्या हुने गरेको छ ।
यस वर्ष पनि गत पुस ३० गते नगरसभा सम्पन्न भएको थियो । नगरसभा सम्पन्न हुनुअघि आफूले काम गर्न नसकी उपप्रमुखलाई कार्यबाहक दिएका नगरप्रमुख लामा ४ महिनापछि फागुन ८ गते कार्यालय फर्किएका थिए ।
फागुन ८ गते आफू कार्यालय गएकै दिनको भोलिपल्टदेखि प्रमुख प्रशासकीय अधिकृत कार्यालय नआएका लामा बताउँछन् ।
मेयर भन्छन्, ‘उहाँले बिदा लिएको बारे अफिसियल्ली केही थाहा छैन । मन्त्रालयतिरै लिएको भए के जान्नु !’
मेयर लामाको स्टास यस्तो छ-
सुरेन्द्र प्रधान सर (प्रमुख प्रशासकीय अधिकृत) नमस्कार । धेरै भयो हजुर नगरपालिकामा नबस्नु भको, अब त घर बस्न पनि दिक्क भो होला । नगरका धेरै जनताका काम अपुरा छन्, नगर ठप्प भाको छ । म हजुरलाई बिन्ति गर्छु, आउनुस्, काम गर्नुस, मैले भनेका काम गर्नु पर्दैन, अहिलेसम्म गर्नु पनि भाको छैन । कानुनसँग मेल खाने काम गर्नुस् । कानुनले धेरै अधिकार तपाईं जस्तै कर्मचारीलाई दिएको छ । जनतालाई खुशी पारौँ हामी मिली । जनताका खुशी नै हाम्रो खुशी हो ।
फागुन ८ गतेदेखि हाजिर नभए पनि नगरपालिकाका कर्मचारीलाई भने घरबाटै कागजी हस्ताक्षरको काम प्रमुख प्रशासकीय अधिकृतले गर्ने गरेका छन् । नगरपालिकाको अफिसियल सम्पर्क नम्बर स्वीच अफ गरेर कार्यालयमा नै छाडेर प्रमुख प्रशासकीय अधिकृत घर बसेको नगरपालिका स्रोतले बताएको छ ।
यसअघि पनि नगरप्रमुखले मनोमानी निर्णय अनुसार विनियोजन गरिएका बजेट भुक्तानी कागजमा हस्ताक्षर गर्न दबाब दिने भन्दै प्रमुख प्रशासकीय अधिकृतहरु हाजिर हुने बित्तिकै सरुवा माग्ने गरेका थिए । अहिलेका प्रमुख कार्यकारी अधिकृतलाई पनि रातो किताबमा नभएका योजनामा हस्ताक्षर गर्न दबाब दिएपछि घर बसेको नगरपालिका स्रोतले नेपाल प्रेसलाई बतायो । प्रमुख कार्यकारी अधिकृत प्रधानको व्यक्तिगत नम्बरमा सम्पर्क गर्दा उनी सम्पर्कमा भने आउन चाहेनन् ।
